نقلا عن صفحة الكاتب الساخر عبدالرحمن العريقي على فيسبوك.

افرض افرض افرض والعياذ بالله اني كنت انا الامين العام لحزب الاصلاح او مسؤول صاحب قرار في الشرعية ... وبيدي مارب اهم مدينة على وشك ان تسقط بيد الحوثة .... ايش باعمل انا الرعوي اللي عمري مالبست كرافتة ومافهمش بالعسكرة ولا السياسة ؟؟؟؟؟

على طول باخرج مليون دبة غاز الصبح الصبح... وابيع الدبة بعشرة الف كاش اللي يشتي يشتري واللي مايشتيش عمر امه يخلي مرته تحطب.. واسلم لكل جندي يدافع عن مارب الف دولار ولعائلته الف دولار.

وكل شهر مثلها... واللي يموت لعائلته عشرة الف وراتب شهري كاش دولارات خضر اخليهم يحاربوا بنفس.

وهكذا كل يوم... حرام ماتخرج من مارب نطفة غاز او بترول من مارب الا كاش وفلوسها رواتب للمحاربين وبعد شهر تكون السفن في شبوة تنفل صواريخ حرارية واسلحة وذخائر.

لكن الفشلة مرتاحين بالفنادق رؤسهم بين الدسم ومجوعين جنودهم ويجوا لعندي يبكوا تبرعوا يامحسنين عملنالك رقم حساب للتبرع  لمارب... الحقونا ياقبائل غيروا علينا.. ويتبكبكوا لحضني.

كم صحنا ياخبرة الحقوا حجور بيشلوها الحوثة.. ماعلش ماعلش  ادر لاخيك الخد الاخر.

الحقوا البيضاء وقانية  وبني عواض بيشلوها الحوثة.. ماعلش ادر لاخيك الخد الاخر  الحقوا نهم ياخبرة بيبزوها... ماعليش ادر لاخيك الخد الاخر.

الحقوا الجوف يا مؤمنيين ... سهل ياخي بطل الازعاج.

وملطام بعد ملطام بعد ملطام .. ولما الحوثة قدهم يتوضوا بماء سد مارب.

طلع لي حميد الاحمر في مقابلة مع القدس العربي يطمنا  ويقلي  هذين سقطين مثل صنعاء بدون قتال لاسباب خاطئة من قبل الشرعية... واليدومي يعمل منشور يكتب فيه مارب وبعدها ثلاث علامات استفهام.

عارك على (...) اليدومي على (...) الحسابات الخاطئة على (...) الشرعية على (...) الاصلاح على (...) الجيش الوطني على عار ثورة جابتكم.

وحرام بالله لولا اني ناصبي واكره السرق الحوثة السلاليين وادري ان ما منهم خير لرنجت جبهتي بأخضر وصرخت معاهم من باطلكم يا .....

انتم اللي افسدتم ودمرتم الاقتصاد والسياسة والعسكرية والبلد مش سرقي زغيبر بتعز.

جا يقلي ثورة (.....)!